1646

Беларускія іконы пасля дэманстрацыі ў Ватыкане выставілі ў Мінску

У экспазіцыі дэманструюцца праваслаўныя, каталіцкія, уніяцкія абразы і алтарныя карціны, мастацкае ткацтва, прадметы літургіі. На выставе згодна з храналогіяй прадстаўлены творы са збору Нацыянальнага мастацкага музея Рэспублікі Беларусь і абразы сучасных іканапісцаў, якія працягваюць старажытныя традыцыі Візантыі і краін Балканскага рэгіёна.

Арганізатары праекта імкнуліся на прыкладзе мастацкіх помнікаў розных канфесій паказаць падабенства і адрозненне ў трактоўках рэлігійных сюжэтаў, а таксама акцэнтаваць увагу гледача на галоўным пастулаце – адзінай крыніцы фарміравання хрысціянскай культуры.

У склад выставы ўвайшлі практычна ўсе абразы, паказаныя ў Музеях Ватыкана з 18 мая па 25 ліпеня 2016 года. Гэты міжнародны выставачны праект стаў найбуйнейшай падзеяй у гісторыі беларускай культуры. Несумненна, увагу гледачоў прыцягне раздзел, прысвечаны дзейнасці рэстаўратараў музея, дзякуючы працы якіх адраджаюцца сапраўдныя шэдэўры нацыянальнага мастацтва, што знаходзіліся на мяжы знікнення.

Адкрываюць экспазіцыю абразы «Спас Уседзяржыцель» і «Маці Божая з дзіцем» 1670-х гг. з Мікалаеўскай царквы Пінска, што захавалі традыцыйную візантыйскую іканаграфію, на аснове якой выканана пераважная большасць абразоў для мясцовага рада беларускіх іканастасаў.

Комплекс жывапісных твораў каталіцкага кляштара святой Брыгіты ў Гродна сярэдзіны XVII ст. дэманструе ўплыў заходнееўрапейскай, перш за ўсё фламандскай, мастацкай культуры на творчасць мясцовых майстроў.

У 2009 годзе па благаславенні Мітрапаліта Мінскага і Слуцкага Філарэта, Патрыяршага Экзарха ўсяе Беларусі, у Нацыянальны мастацкі музей Жыровіцкім манастыром перададзены сем старажытных абразоў з іканастаса Успенскага сабора, пабудаванага каля 1730 года.

Абразы святочнага рада іканастаса прадстаўлены двума комплексамі: з Аброва (сярэдзіна XVIII ст.) – авальнай формы з фігурным апраўленнем - і Шарашова (другая палова XVIII ст.) – рэдкай іканаграфіі і незвычайнай кампазіцыі.

Дэкаратыўна-прыкладное мастацтва прадстаўлена царкоўным каталіцкім убраннем з тканін заходнееўрапейскай вытворчасці, прадметамі літургіі – алтарнымі і напрастольнымі крыжамі, чашамі для прычашчэння, дыскасам, аправамі абразоў.

Сакральныя творы даюць уяўленне аб асаблівасцях фарміравання беларускага мастацтва ў складаным узаемадзеянні з культурамі Захаду і Усходу. Беларускія майстры асвойваюць новыя тэхналогіі, тэмы і сюжэты, прыўносяць у царкоўную культуру сваё бачанне і разуменне нябеснага свету, цесна звязанага з зямнымі рэаліямі.

Знамянальна, што выстава праходзіць у Год культуры Беларусі, аб’яўлены прэзідэнтам Рэспублікі Беларусь, і Пазачарговы Юбілейны (Святы) год міласэрнасці, які абвешчаны Папам Рымскім Францыскам 11 красавіка 2015 года. Яго дэвіз – «Міласэрныя, як Айцец». Працягласць яго ўстаноўлена з 8 снежня 2015 года па 20 лістапада 2016 года.

Выстава працуе па 30 студзеня 2017 года. 

Оставить комментарий (0)

Также вам может быть интересно