25 студзеня ў Мiнску пройдзе вечар паэтычных імправізацый «Вершы ў Шафе»

Статья по теме

Сапраўдны сэнс жыцця. Рыскi да партрэта мастака Анатоля Александровіча

Як паведамілi «АіФ» арганізатары мерапрыемства, галоўным госцем новай сустрэчы стане паэт Наста Кудасава. 25 студзеня яна спецыяльна прыедзе да слухачоў з Рагачова. Наста Кудасава прачытае шэраг сваіх вершаў са зборніка «Маё невымаўля».

• «Горыч прымi ўнутрывочна, але – палай.
• Хай надрываецца, кволiцца кнот, але грэе.
• Быць цi не быць – гэта толькi пытанне цяпла,
• Толькi пытанне ўключанасцi батарэi.
• Там, у адсеках нутра, дзе балiць i пячэ, –
• Зрэшты, табе аднаму зразумелае пекла.
• Быць цi не быць – гэта толькi пытанне вачэй,
• Здольных аднойчы ўтрымаць на зямлi чалавека».

Чытачы маюць шанец паразмаўляць з паэтам, набыць яе зборнік, а таксама атрымаць аўтограф. На паэтычнай вечарыне таксама прачытаюць свае вершы Кацярына Массэ і Даша Бялькевіч.

Нагадаем, першы вечар паэтычных імправізацый прайшоў у «Кніжнай шафе» ў канцы лістапада мінулага года. Тады галоўным госцем стаў вядомы беларускі паэт Віктар Жыбуль. Ён прадставіў публіцы каля дзясятка лепшых вершаў са свайго апошняга зборніка «Дзяцел і дупло». Свае вершы таксама прапанавалі маладыя творцы – Дзмітрый Рубін і Крысціна Бандурына.

Дарэчы, прыняць удзел як у якасці паэта, так і ў якасці слухача мае магчымасць любы жадаючы. Паэтам дастаткова загадзя звярнуцца да арганізатараў, а слухачам – прыйсці ў назначаны час у «Кніжную шафу». Пры гэтым свае творы можна прадставіць на любой мове.

Мерапрыемства «Вершы ў Шафе» з Настай Кудасавай пройдзе 25 студзеня ў 19.00 у памяшканні Кніжна-выставачнай прасторы «Кніжная шафа» ў Мінску (пр. Дзяржынскага, 9 (уваход са двара)). Уваход вольны.