29-30 чэрвеня можна пачуць прэм’еру радыёспектакля «Найдорф»

29 і 30 чэрвеня на хвалях Першага нацыянальнага канала слухачы пачуюць прэм’еру радыёспектакля “Найдорф” паводле аднайменнай аповесці лаўрэата Дзяржаўнай прэміі Беларусі пісьменніка Івана Пташнікава. Праект прымеркаваны да 75-годдзя Вялікай Перамогі і чарговай гадавіны Вызвалення Беларусі ад нямецка-фашысцкіх захопнікаў.

Дзеянне ў спектаклі адбываецца ў 1944-м годзе, напярэдадні вызвалення Беларусі. Аповесць напісана па рэальных фактах, звязаных з жыццём самога аўтара, падлетка на той час. У яго памяці назаўсёды засталіся жахі карніцкіх аперацый і вобразы сапраўдных герояў, што ратавалі родны край. Згадваючы “Найдорф”, Пташнікаў пісаў: “Мне хацелася на былых рэальных фактах, сваіх вясковых, стварыць вобраз мужнага чалавека Вялікай Айчыннай, аратара і партызана, які араў, сеяў, быў верны сваёй зямлі і тут жа злёг у зямлю, баронячы яе ад фашызму… Гэта быў час, калі гарэлі ў лютым агні беларускія вёскі… У гэты час згарэла Дальва з людзьмі, згарэла мая хата ў маёй вёсцы…”.

У радыёспектаклі захоўваецца скарыстаны аўтарам мастацкі прыём супрацьпастаўлення падзей ваеннага і мірнага жыцця. Галоўныя героі ў думках пастаянна вяртаюцца ў даваенны час да сваёй сям’і, сваіх блізкіх, і гэтыя два планы яшчэ больш падкрэсліваюць трагедыю вайны, яе антычалавечыя законы.

Сімвалічная сама назва “Найдорф”. Так названы і беларуская, і нямецкая вёскі, з якой, дарэчы, родам адзін з герояў – палонны немец. Найдорф – сімвал новага жыцця, што наступіць пасля вайны, перамога ў якой вельмі дорага каштавала беларусам...

«Бей их, Алёша!». Сериал по повести И. Пташникова бьет рейтинги просмотров Подробнее

Творчая група праекта: аўтар інсцэніроўкі для радыё – пісьменнік Уладзімір Сцяпан, рэжысёр пастаноўкі – Алег Вінярскі, музыка – кампазітар Дзмітрый Далгалёў, гукарэжысёр – Валерый Бяляеў, рэдактар і кіраўнік праекта – Галіна Шаблінская.

Ролі выконваюць: ад аўтара – заслужаны артыст Рэспублікі Беларусь Аляксандр Шароў; Яхрэм Жаваранка і яго жонка Кланя – заслужаныя артысты нашай краіны Ігар Дзянісаў і Алена Сідарава; Алёша Белановіч – артыст Нікіта Кратовіч; Александрына, маці Алёшы – народная артыстка Беларусі Зінаіда Зубкова; Ушакоў, партызанскі камандзір – заслужаны артыст рэспублікі Леанід Улашчанка; Альдзя – артыстка Арына Рабычына; Юлька, маці Альдзі – артыстка Таццяна Баўкалава; Галіна Аляксандрава – артыстка Вераніка Буслаева.

Прэм’ера радыёспектакля “Найдорф” адбудзецца на Першым нацыянальным канале Беларускага радыё 29 і 30 чэрвеня ў 22.05.