21108

Член Савета Рэспублікі Віктар ЧАЙЧЫЦ: "Трэба прызнаць памылкі"

Пра неабходнасць пакарання вінаватых, а таксама аказанне абавязковай дапамогі ўсім пацярпелым ад незаконных дзеянняў, член Савета Рэспублікі старшыня Беларускай рэспубліканскай калегіі адвакатаў (БРКА) Віктар ЧАЙЧЫЦ расказаў на сваёй старонцы ў Fасеbооk. Ён пракаментаваў сваё стаўленне да падзей у Беларусі:

— Мы заўжды, і я ў прыватнасці, з павагай ставіліся да праваахоўных органаў і казалі, што яны такія ж грамадзяне Беларусі, як і іншыя людзі, і маюць права на юрыдычную дапамогу. Асобныя адвакаты і зараз заключылі дагаворы з работнікамі праваахоўных органаў па аказанні ім юрыдычнай дапамогі, але ў большасці мы цяпер будзем аказваць дапамогу грамадзянам. Бо менавіта грамадзяне звяртаюцца да нас і расказваюць пра правапарушэнні, якія здзейснілі работнікі праваахоўных органаў.

— Праводзіць такія жорсткія затрыманні і збіванні, асабліва ўжо пасля таго, як чалавека затрымалі, — гэта не проста недапушчальна, а злачынна. Тыя, хто зрабіў гэта, павінны панесці адказнасць. Калі супрацоўнік зрабіў гэта самастойна (эксцэс выканаўцы), то ён павінен адказаць за гэта. Калі ён атрымаў злачынны загад, супрацоўнік павінен адказваць разам з кіраўніком, — упэўнены сенатар.

Утрыманне людзей у месцах, якія абмяжоўваюць свабоду чалавека, павінна адпавядаць санітарным і чалавечым нормам. А людзі расказваюць, што іх было там як селядцоў у бочцы. Гэта таксама недапушчальна, падкрэсліў ён:

— Недапушчэнне адвакатаў у ЦВК са спасылкай, што гэта зрабіць немагчыма праз каранцін з-за пандэміі, а ў адну камеру, якая разлічана на шэсць чалавек, набіваць па некалькі дзясяткаў чалавек, на маю думку, таксама няправільна. Няправільныя дзеянні асобных супрацоўнікаў якраз і прывялі да гэтых масавых выступленняў, таму што людзі абураны, і аб'ектыўна абураны.

На сайце БРКА паведамляецца, што адвакаты гатовыя бясплатна аказваць юрыдычную дапамогу па адміністрацыйных справах усім пацярпелым падчас пратэсных акцый: кансультаванне, складанне заяў, скаргаў на пастановы аб прыцягненні да адміністрацыйнай адказнасці, скаргаў на неправамерныя дзеянні супрацоўнікаў міліцыі, на парушэнне парадку знаходжання ў ізалятарах часовага ўтрымання і іншыя моманты.

Адвакаты Беларусі заўжды змагаліся і змагаюцца за правы і свабоды грамадзян, асуджалі і асуджаюць любую агрэсію, у тым ліку канфлікты і супрацьстаянне, якія адбываюцца ў краіне зараз, падкрэсліў Віктар Чайчыц.

Старшыня БРКА расказаў, што ён апублікаваў у сацыяльнай сетцы свой нумар тэлефона, бо людзі расказваюць самыя розныя і жудасныя гісторыі. І, калі іх сведчанні пацвердзяцца, ён гатовы прадстаўляць інтарэсы гэтых людзей і рабіць усё магчымае, каб справядлівасць і законнасць перамаглі:

— Канешне, кожны выпадак трэба разбіраць асобна і дасканала. Калі хтосьці на кагосьці кідаўся з нажом ці гранатай, гэта адна сітуацыя. Аднак калі чалавек мірна ішоў, а ёсць сведчанні пра факты, што людзей выхоплівалі з пад'ездаў, то гэта зусім іншае. Я не магу ведаць усяго і казаць, што з боку грамадзян былі адно выключна правільныя дзеянні, аднак, на маю думку, калі цяпер да адказнасці прыцягнуць людзей, якія дапусцілі парушэнні, то гэта пакажа сілу нашай дзяржавы. А сіла і аўтарытэт дзяржавы не толькі ў тым, каб змагацца, а і ў тым, каб прызнаць памылкі асобных сваіх супрацоўнікаў і пакараць іх за гэта.

Адносна выпісаных штрафаў павінны вырашаць самі людзі. Калі яны лічаць, што вінаватыя, і хочуць аплаціць штраф, ніхто іх спыняць не будзе. Аднак калі чалавек лічыць, што няправільна прыцягнуты да адміністрацыйнай адказнасці, то ён павінен звярнуцца да адваката і падрыхтаваць скаргу, каб аспрэчыць незаконную пастанову. Далей разбірацца ў тым, чыя праўда, будзе суд.

Оставить комментарий (0)

Подписка в 2020 году



Топ 5 читаемых